Халықаралық Edu Stream білім орталығының директоры Наталья Мұхамеджанова Дубайда өткен беделді Ғалам әйелдері саммитінде Қазақстанның кәсіпкер әйелдерінің әлеуметтік жауапкершілігі туралы баяндады. Осы орайда әлемнің 70 мемлекетінің 800 бизнес иесі, отандық кәсіпкер әйелдерге қошеметін көрсетті. Еліміздің Іскер әйелдері қауымдастығы атынан сөз сөйлеген Наталья, Edu Stream компаниясының бірқатар әлеуметтік жобасын: жағдайы төмен отбасы балаларына ағылшынды тегін оқытқан «Open Mind», мектеп ұстаздары мен оқушылары арасында ағылшынша өтетін «Edu Stream Zhuldyzdary» конкурсы, мыңдаған бала қатысқан «Жануарлар – менің достарым!» сурет байқауы, ерекше баласы бар аналарға кәсіп ашуға және жұмысқа тұруға бағытталған «Әйелдер әйелдерге» жобасы және креативті «Менің сүйікті қалам» эко-акциясын атап өтті.
Ғалам әйелдері саммитінің негізін АҚШ әйелдері ұйымының көшбасшысы тамыры филиппиндық Ирене Нативидат қалаған. Шараға дамыған елдерден министрліктер мен Amazon, IBM, Procter&Gambel, Danone сияқты әлемдік ірі алпауыт бренд өкілдері қатысты. Саммитте дүние жүзінің экономикасы, криптовалюта, роботтар, климат, экология, ғаламдық кәсіптің дамуы және ондағы әйелдің орны талқыланды.
— Мен осындай маңызды саммитке қатысуға мүмкіндік берген Қазақстанның Іскер әйелдері қауымдастығының басшысы Сәрсембаева Раушан Бергібайқызына алғыс білдіремін, неге десеңіз, мұндай шара алға дамуға, өз елің жайлы, біздің әйелдердің дамуы туралы паш етуге шабыт береді, әлеммен байланыс орнатады. Алған әсерімді өзіме ұнайтын Джеймс Стефенстің сөзімен қысқа қайырсам: «Әйелдер еркектерге қарағанда ақылдырақ, себебі аз білсе де, көбірек түсінеді», — деп атап өтті Наталья Мұхамеджанова.
Осылайша Edu Stream компаниясы дүние жүзіне танылды!