«Edu Stream» білім беру орталығының атынан оның директоры Наталья Мухамеджанова «Қайырымдылық керуені» беделді республикалық конкурсының күміс медалін иеленді. Конкурсты бірнеше жылдан бері қайырымдылық идеяларын кеңінен насихаттау мақсатында Нұрсұлтан Назарбаев қоры, Қазақстан іскер әйелдер қауымдастығы, «Хабар» агенттігі, «КТК» телеарнасы бірлесіп өткізіп келеді.

Лауреаттар бес номинация бойынша іріктелді, біздің орталық білім беру, экология және көркейту саласында көмек көрсететін адамдар ретінде «Open mind» жобасы үшін «Мейiрiм жолында» номинациясы бойынша жеңіске жетті. Біз 600-ден астам қатысушының ішінен екінші орынды иелендік (!).

2019 жылы «Open mind» жобасы аясында біз аз қамтылған Нұр-Сұлтан және Алматы қалаларының отбасыларынан шыққан бір жарым мың балаға ағылшын тілін тегін үйреттік, ал үздік оқыған бес бала Лондонда демалып қайтты. Олардың көбісі ағылшын тілін жетік меңгеруді әлі де жалғастырып келеді, өйткені олар тіл бүкіл әлемді ашатынын түсінеді.

— Ақшаны балаларға жұмсау — бұл өзіңіз тұратын, жұмыс істейтін елдің болашағына салынған инвестиция, — деп түсіндірді Наталья Мухамеджанова, — Балалардың біздің сабаққа қалай жүгіріп келетінін, оқығанын көргенде, қандай эмоцияларға берілгенімізді сөзбен жеткізе алмаймын! Кейін олар Лондонға барды, олардың барлығы дерлік бұған дейін ұшаққа отырып та көрмеген еді.

Марапатталғандардың арасында бүгінгі күннің нағыз қаһармандары болды. Адамдар өз қаражатын ауылдарындағы өмір сүру жағдайын көтеру үшін мектептер мен балабақшалар салуға, мұқтаж жандарға дәрі-дәрмек сатып алуға, төсек тартып жатқан адамдарға жақпа ойлап табуға, әрі оны таратуға, үйсіз адамдар мен жануарларға баспана салуға жұмсап жатыр.

Лисаковск тұрғыны Алексей өз бауырының бір бөлігін науқас балаға берді, астаналық кішкентай Ералы карантин кезінде ақша жинап жүрген сандықшасын жарып, бар жинаған ақшасын көмекке мұқтаж көршісіне тыныс алу аппаратын сатып алуға жұмсады, павлодарлық жедел жәрдем медбикесі Сая екі шақырым бойы инсульт болған зейнеткерді машина өте алмаған қар құрсауынан арқалап жеткізді. Ол тіпті Алматыдағы марапаттау рәсіміне жарақатпен келді, басқа науқасты алып келгенде зақымданған болатын.

Осындай нағыз қаһармандардың ішінде біздің компания «Edu Stream» жобасының да аталғаны қуантпай қоймайды.