2022 жылы мамырдың 31-де ғылым мен білім саласын нығайту, соның ішінде сапалы педагогтарды даярлау мақсатында «Ағылшын тілін оқытудағы тиімді және заманауи инновациялық технологиялар» атты семинар өтті.

Ол Атырау облысының Білім басқармасы басшысының м.а. А.Б. Дюсекенованың қолдауымен «Express Publishing» халықаралық баспасының ресми өкілі ретінде «EDU Stream» халықаралық білім беру орталығымен (одан әрі - Орталық) ұйымдастырылды.

Мемлекет басшысы Қасым-Жомарт Кемелұлы Тоқаев өз жолдауында атап өткендей, мұғалімдерді қазіргідей 5 жылда емес, 3 жылда бір рет қайта даярлықтан өткізуіміз керек. Өйткені олар шәкіртінің бойына жаңа білім сіңіре алатындай нағыз ағартушы болуға тиіс. Біздің міндетіміз — халықаралық деңгейде сұранысқа ие мамандарды тәрбиелеу. Білім саласындағы инновациялық өзгерістерге дайын болуымыз керек.

Осыған байланысты Орталық атынан Атырау қаласы және облысының ағылшын тілі пәні бойынша әдістемелік бірлестіктің (кафедраның) басшылары және ағылшын тілі мұғалімдері, әдіскерлер және мемлекеттік сатып алу жөніндегі мамандарымен ағылшын тілін оқытудағы тиімді және заманауи инновациялық технологиялар талқыланды.

Басты мақсаты ретінде мектеп мұғалімдерінің қалыптасқан кәсіби құзыреттілігін жетілдіру, ағылшын тілі пәніне арналған әдістемелік кешендерді тәжірибе жүзінде тиімді пайдалануына ықпал ету, педагогикалық шеберлікті арттыру, сондай-ақ практикалық және әдістемелік көмек көрсету болып табылады.